الحق والضلال الحق والضلال
البحث

تابعنا على



العودة الى الرئيسية

حكايه عجيبه لعم سامي اللي سافر ليبيا وسكن مع واحد من عبدة الشيطان ..شوف حصل بينهم ايه وايه اللي جري في المستشفي مع عم سامي

منذ 1 اسابيع
December 7, 2018, 2:42 pm
بلغ عن المحتوى
حكايه عجيبه لعم سامي اللي سافر ليبيا وسكن مع واحد من عبدة الشيطان ..شوف حصل بينهم ايه وايه اللي جري في المستشفي مع عم سامي

مواضيع عامه 

بقلم كيرلس فتحي 

عم سامى 62 سنه راجل مزارع من صعيد مصر كان شغال عامل بناء فى ليبيا من عشرين سنه ، حصل معاه موقف كل الدكاتره أجمعوا إنه المفروض يكون مات لولا حدوث شئ غير متوقع تماماً
عم سامى بيقول .
سنة 90 ابويا تعب قوى وصرفنا على مرضه كل اللى حيلتنا حتى حتة الأرض بعناها ، لكن كل ده ماجبش فايده وربنا إختاره ، بقيت اشتغل مزارع أجير فى أراضى الناس عشان الاقى أوكل عيالى ، لكن الحال كان ضيق قوى وكانت الفلوس مش مقضيه ، فقررت أسافر ليبيا بعد ما سمعت ان الشغل هناك فلوسه كتير ، ايامها كان السفر سهل ،روحت ليبيا لوحدى وماليش أى حد هناك ، ربنا كرمنى بواحد اتعرفت عليه فى الأتوبيس قالى تعالى اقعد معانا فى السكن لغاية ماربنا يكرمك بشغل ، بالفعل روحت معاه السكن ودفعت إيجار شهر مقدم معاهم .
السكن هناك عباره عن حوش كبير ومتقسم غرف كتير ، وكل واحد وله غرفته ، صاحبنا ده عرّفنى على الناس اللى معاه وجه عند واحد اسمه فهد من جنوب أفريقيا بس بيتكلم عربى مكسر وقالى بصوت واطى .
- مالكش دعوه بده عشان من عبدة الشيطان ومالوش دين
بصيتله وانا مستغرب جدا قولتله .
- إزاى مش باين عليه ، انت عرفت منين ؟ 
قالى 
- قالى انت مش شايف شكله يرعب إزاى وكمان ، عمرى ما شوفته بيصلى ودايماً ساكت وناس بتقول انهم شافو دخان بيطلع من أوضته ونور أحمر من تحت عقب الباب .
انا سمعت كلامه من هنا وجتتى إتلبشت وفضلت باصص لفهد بكل قرف وانا مستغرب ازاى فى ناس كدا .
المهم عدا كام يوم وانا متجنبه خالص لدرجة انه كان يرمى عليا السلام ماردش عليه
فضلت قاعد فى البيت اكتر من اسبوع وبدور على شغل مافيش ، واسال الناس اللى معايا يقولولى مافيش .
الفلوس اللى معايا قربت تخلص وبقيت اكل مره واحده بس فى اليوم عشان أوفر لحد ماربنا يفرجها . 
لغاية ما جه يوم مستحيل انساه ، انا فاكر اليوم ده كويس بكل تفاصيله 
كان يوم اربع وفلوسى خلصت وماكنتش واكل خالص وجعان قوى بقيت اكل سكر عشان اسد جوعى ، ساعتها بالظبط كانت الساعه 2.25 بعد الضهر الباب خبط ، لاقيت فهد واقف ومعاه اكل ومبتسم ليا وبيقولى اتفضل كان نفسى اقفل الباب فى وشه ، لكن ماقدرتش بصراحه اتكسفت الراجل مهما كان على باب اوضتى ، بس كل اللى قدرت اعمله انى اقابل إبتسامته بتكشيره وقولتله شكرا ، الراجل صمم وساب ليا الاكل ومشى .
من شدة الجوع اللى كنت فيها ماقدرتش امسك نفسى ، وكلت
بعدها بعشر دقايق حسيت بوجع شديد جدا فى بطنى كلها
. اول حاجه جات فى دماغى الاكل مسموم فهد سممنى.
فطلت اصرخ من الوجع لغاية ما أغمى عليا
صحيت على شكة حقنه فى دراعى ، لما بدأت استوعب لاقيت نفسى على سرير مستشفى ودكتور واقف بقوله فهد سممنى يا دكتور
قالى فهد مين
قولتله 
- الراجل الكافر اللى ساكن جنبى
وسط كلامى صرخت وقولتله 
-اهو هو ده اللى سممنى ، هو ده اللى كان عاوز يموتنى
- لاقيت الدكتور ضحك وقال .
- ياراجل حرام عليك دا لولاه كان زمانك ميت ، ده الراجل جابك هنا شايلك على كتفه ، واحنا وبنشيلك الزايده حصلك نزيف واتبرعلك بدمه
بصيتله كدا وانا مستغرب وقولتله .
- يعنى الاكل مش مسمم ؟ 
رد عليا بسخريه وقال
- دا فكرك هو اللى مسمم ، الراجل اللى انت بتقول انه سممك ، كان موصينى انى ماقولكش على انه اتبرعلك بدمه ، خاف لاتزعل ، لانه عارف انك بتكرهه بسبب الكلام الباطل اللى سمعته عليه من الناس اللى معاك اللى انت فاكرهم مؤمنين
فكر بعقلك وقلبك مش بودانك .
لو الإيمان بيزرع الكراهيه فى قلبك للناس إذاً إيمانك باطل . 
بقلم/#كيرلس_فتحى 










شارك بتعليقك
فيسبوك ()
كتب بواسطة Flysmsm
تنوية هام: الموقع غير مسئول عن صحة ومصداقية الخبر يتم نشره نقلاً عن مصادر صحفية أخرى، ومن ثم لا يتحمل أي مسئولية قانونية أو أدبية وإنما يتحملها المصدر الرئيسى للخبر. والموقع يقوم فقط بنقل ما يتم تداولة فى الأوساط الإعلامية المصرية والعالمية لتقديم خدمة إخبارية متكاملة.