الحق والضلال الحق والضلال
البحث

تابعنا على



العودة الى الرئيسية

صلاة أرملة تغير أوضاع البلد

منذ 2 شهر
January 11, 2019, 10:48 pm
بلغ عن المحتوى
صلاة أرملة تغير أوضاع البلد

كتب كيرلس فتحي
حسام شاب عنده 25 عازب اصوله من الصعيد ، لكنه عايش مغترب فى القاهره بحكم شغله مهندس مدنى ، إتصل بيا إمبارح وحكالى على موقف غريب جدا حصل معاه .
حسام شغال مع مقاول كبير قوى فى القاهره ، بيدخل على البيوت القديمه يشتريها ويهدها ويبنيها برج 
شهر مارس اللى فات المقاول ده إشترى بيت قديم مكون من دورين ، اول دور ساكنه فيه ست أرمله وعيالها ،وتانى دور فاضى .
صاحب البيت باعه عشان مسافر بره ومش قادر يستفاد بالبيت خصوصاً حتى إيجار الشقه المسكونه قليل قوى لانه إيجار قديم .
يوم 2 أبريل الساعه 8.35 بالليل كنت قاعد على القهوه مع المقاول بنتفق على شغل ، فا إتفتح موضوع البيت 
لما سألت المقاول ، انت هاتعمل ايه ببيت زى ده ، وهاتعمل ايه مع الست اللى ساكنه .
قالى ده بيت لقطه ، خدته بتراب الفلوس والست دى هاعرف هاطلعها من البيت من غير مادفعلها ولا مليم 
المقاول ده له معارف تقيله جدا فى البلد ويقدر فعلا يطلعها من البيت 
قولتله بس دى أرمله هاتروح فين بعيالها ، قالى ليها رب ، انا ماليش دعوه ، اهم حاجه مصلحتى تتقضى من غير ماخسر ولا شلن 
كان بيتكلم معايا بكل ثقه وهو ماسك لى الشيشه وبيطلع دخانها كأن جواه جهنم قايده . إنتفضت من مكانى وبنفض هدومى من دخان شيشته اللى عمانى به، وقولتله 
-طب أسيبك انا عشان أتاخرت ولازم أمشى 
- رايح فين ده لسه الساعه ماجتش عشره ؟ 
- معلش تعبان شويه وعاوز ارتاح 
- طب يلا ربنا معاك .
مشيت من غير ما ارد عليه ، وبقول فى سرى هو انت تعرف ربنا اصلاً 😒
فضلت ماشى وانا محتار اعمل ايه ، صعبانه عليا الست ، وخايف أشيل ذنبها لو سكت على اللى هايعمله المفترى ده ، وبصراحه مش هاقدر اقف قدامه ، بتلفون واحد منه ممكن يحبسنى .
وقفت للحظه لما سمعت صوت مهزوز من ست كبيره بتنادى عليا ، بصيت لها فى عينها حسيت بإحتياجها الشديد ، كانت بتقولى يابنى وحاطه قدامها مناديل ، حسيتها بتترجانى عشان أشترى منها ، ساعتها من غير مانطق ولا كلمه حطيت إيدى فى جيبى وايديتها اللى فيه النصيب ومشيت 
بعد خطوتين سمعتها بتدعى دعوه هزت قلبى بجد ، بصوت صارخ قالت .
- روح ربنا يقويك ويجعلك ناصر للغلابه .
جسمى قشعر من دعوتها ، حسيت ربنا بيكلمنى ويقولى أوعى تسيب الست الأرمله ، أقف قدام الظلم وماتخافشى انا معاك 
سمعت الدعوه ومشيت أتمألها وعينيا شارده فى الشارع ، بتخيل كل حاجه ممكن تحصل 
فضلت ماشى لغاية ما وقفت وبدأت أستوعب انى وصلت بيت الأرمله  
وكأن كل حواسى رافضين السكوت على الظلم ووجهونى لبيت الأرمله تلقائى .
خبطت على شقتها ، فتحتى ست فى الأربعينات ملابسها سودا ، وعلى وشها علامات التعب 
عرفتها بنفسى وسمحتلى بالدخول بعد طلبى 
قولتلها .
- دلوقتى صاحب البيت باعه لمقاول تقيل قوى فى البلد ، وله معارف مهمه ، وناوى يخرجك من البيت من غير ما حتى يتفاوض معاكى ولا يديلك مليم واحد ، هاتعملى ايه ، عندك حد تروحيله ؟ 
كنت متوقع انها هاتتخض وتنهار من كلامى لكن فجأتنى بهدوئها وإبتسامتها العجيبه وقالتلى 
- طالما هو راجل مهم ومش هاقدر اخد حقى منه بالقانون الأرضى ، يبقى ربنا يجيبلى حقى منه بالقانون السماوى  
رديت عليها وانا على وشى علامات إستفهام كتيرت لرد فعلها .
- أيوه يعنى هاتسكتى ؟ 
- مافيش حاجه فى إيديا أعملها غير انى أطلب ربنا .
مشيت من عندها وانا فعلا مش عارف أعمل ايه  
يوم 20 إبريل الساعه 12 الضهر لاقيت المقاول بيكلمنى بيقولى جهز نفسك عشان خلاص خدنا قرار بإزالة البيت وهانبدأ الهد بعد تلات أيام يوم 24 إبريل  
قولتله طب والست اللى فى البيت عملت معاها إيه .
- مش انا اللى عملت ، إنهرده فى لجنه من الحى راحت وعاينت البيت وقررت انه لازم يتهد عشان ممكن يقع فى اى لحظه ،وأمروها بإخلاء البيت يوم 24 
- إزاى البيت سليم ومافهوش أى مشاكل 
لاقيته ضحك ضحكه مستفزه وقالى 
- طالما انا بقول البيت مش سليم يبقى مش سليم 😈
قفلت معاه ، وفكرت أروح الحى عشان أشتكى هناك ، لكن قولت فى باللى مش هايجيب فايده لان اللجنه أصلا من هناك 
طلعت على القسم كانت الساعه 2.23 بعد الضهر طلبت أعمل محضر فى لجنة الحى وبشكك فى نزاهتها . 
إتسألت هناك مين صاحب البيت .
قولتلهم على إسم المقاول .
لاقيت الظابط ملامح وشه إتغيرت وقالى ثوانى وجاى 
غاب عنى حوالى ساعه إلا ربع ورجعلى وقالى الراجل اللى انت بتتكلم عنه له معارف فى كل حته ، انت كدا داخل حيطه سد مش هاتوصل لحاجه 
- يافندم فى ست أرمله هاتتشرد بعيالها ؟
لحظة صمت منه ونظرة حزن كملت كلامى وقولت
- يعنى مافيش حل ؟ 
- للأسف مش هاقدر أعملك حاجه .
مشيت وانا حاسس بالعجز وخيبة الأمل ، رجعت البيت وقفلت تليفونى وانعزلت تماما عن العالم ودخلت فى حالة إكتئاب شديده . 
ماليش نفس اتكلم مع حد 
كان فى سؤال محيرنى جدااا 
انت فين يارب من الظلم ده كله، هاتسكت ؟ 
عدوا التلات أيام وانا حابس نفسى فى البيت  
يوم 24 الصبح نزلت أشوف حطام البيت المهدوم وكأنى قاصد أعذب نفسى ، بمنظر الست مشرده فى الشارع هى وعيالها  
روحت هناك لاقيت ناس كتير جدا عند البيت وحكومه فى كل حته 
منعونى من الدخول الأول لكن الغريبه انى لاقيت الظابط بتاع القسم اللى روحتله الأول 
أول ماشافنى سمحلى بالدخول فوراً 
قولتله 
- فى إيه كل دول عشان يهدوا البيت للدرجادى الظلم مسيطر فى البلد ؟ 
- إبتسم إبتسامه خفيفه وقالى ، ماتخافش مافيش حاجه هاتتهد 😃
- إزاى والناس دى كلها بتعمل ايه ؟ 
- دول لجنة معيانه خارجيه جاين يعاينوا البيت ، وأقروا ان البيت سليم .
- هو ايه اللى حصل بالظبط ؟
- قدمت بلاغ لهيئة الرقابه الإداريه ضد رئيس الحى ، وإتعمله كمين وتم القبض عليه بتهمة الرشوه ، وقدمت المحضر بتاعك وتم تشكيل لجنه تانى تعاين  😊
فرحت جداااا من الخبر اللى سمعته وكأنى عاوز أطير من الفرحه 
بصيتله وانا رافع حاجبى 
- لكن قولى ياباشا انت ايه اللى غيرك فجأه كدا .
- بصراحه اليوم اللى انت جيتلى فيه ضميرى أنبنى عشان ماقدرتش أساعدك ، وانا مروح بالليل لاقيت ست فى الشارع بتقولى روح ربنا يقويك ويجعلك ناصر للغلابه . 
حسيت ان ربنا بيكلمنى .
قاطعته فى الكلام .
- 😱الست دى عجوزه وبتبيع مناديل 🤔؟
- اه انت تعرفها ؟ 
- واضح ان الست الأرمله دى علاقتها بربنا أقوى من قوى الظلم فى البلد دى  
  
 










اهم الاخبار
شارك بتعليقك
فيسبوك ()
كتب بواسطة roromoha
تنوية هام: الموقع غير مسئول عن صحة ومصداقية الخبر يتم نشره نقلاً عن مصادر صحفية أخرى، ومن ثم لا يتحمل أي مسئولية قانونية أو أدبية وإنما يتحملها المصدر الرئيسى للخبر. والموقع يقوم فقط بنقل ما يتم تداولة فى الأوساط الإعلامية المصرية والعالمية لتقديم خدمة إخبارية متكاملة.