كتب ** رامى كاميل
اسمه مكاريوس. اب اسقف

اللى قدام حضرتك فى الصورة ده راهب بسيط خالص من الرهبان الاقباط اللى ورثوا حياة الزهد و التواضع فى جيناتهم بدون تصنع.

الراجل ده رتبته فى الكنيسة اسقف وده لو هتقيسها بمعايير العالم تقدر تقول انه محافظ لانه بيتولى الشئون الكنسية و رعاية الشعب القبطى فى منطقة محددة "الايبروشية"، اه صدقنى اللى قاعد قدامك على الارض بيضحك ده مقامه محافظ بدرجة وزير.

الرجل ده بيحارب فى اكتر محافظات مصر تطرف من سنين و بيبنى ويعمر كنايس و يساعد شعبه انهم يصلوا و بيتواصل مع شعبه بمنتهى البساطة، اى كان انت مين ابعتله طلب لقاء "بدون اى وسطاء" هيرد و يقابلك بحسب ظروفه و هيستقبلك بنفسه ويبقى عارف ان ده ميعادك و هتكلمه فى المشاكل هيكلمك فى الصلاة.
متخيل شخص بيرعى الاف البشر و بحركة من ايده يحشدهم و يمشيهم و بالتواضع ده.

الشخص ده هو الصوت الصارخ بالحق فى المنيا و امنية حياة الاجهزة الامنية انه يخرج من المنيا عشان يتم ذبح الاقباط من سكات.
الراجل ده هو العقبة فى وش المتطرفين من استكمال خطتهم فى التمكين من المنيا اللى لو كملت بفضل غباء المسئولين فمفيش بعدها محافظة فى الصعيد كله هتكون بعيد عن ايد الارهابيين دول و هتشوفوا مشهد الموصل كذا مرة و اصعب.

الراجل ده بيتم طعنه من كل الجهات حتى من اقرب الدواير له اللى المفروض تكون دواير دعم لكن بتتحول لدواير خسة و ندالة و اكتر ناس مؤمنين به هما الشباب و الفقراء.

انا مش بدعم انبا مكاريوس بس لانه اسقف من عصور قديمة اصبح رجالها عملة نادرة النهاردة لكن كمان لان مكاريوس الانسان، الشخص، الراهب حد مننا وعايش معاناتنا، حد بنشوفه وسطنا بيجبر الخاطر و يطبطب و يسند ويساعد و ينصح و يدافع

مكاريوس. اب برتبة اسقف. 
نقلا عن صفحه  ؤامى كاميل