الحق والضلال الحق والضلال
البحث


أخر 3 كلمات لـ الأنبا صموئيل الذى أستشهد بجوار الرئيس السادات على يد الزمر

منذ 1 شهر
October 7, 2019, 10:10 am بلغ
أخر 3 كلمات لـ الأنبا صموئيل الذى أستشهد بجوار الرئيس السادات على يد الزمر

أخر 3 كلمات لـ  الأنبا صموئيل الذى أستشهد بجوار الرئيس السادات على يد الزمر
موضوع
يوم 6 أكتوبر نحتفل بتذكار إستشهاد القديس  الأنبا_صموئيل أول أسقف للخدمات العامة والإجتماعية
إتولد نيافة أنبا صموئيل في 8 ديسمبر عام 1920 في مركز الزقازيق محافظة الشرقية بإسم  سعد_عزيز ولما وصل سعد لعمر 17 سنة والده مات وكان عليه إنه يتحمل مسئولية الأسرة وهو في سن صغير جداً لحد ما إلتحق عزيز بكلية الحقوق جامعة فؤاد الأول ( حالياً جامعة القاهرة )
بعدها حصل عزيز على بكالريوس الإكليريكية عام 1944 وكان عزيز من أوائل الناس اللي تروح تدرس اللاهوت في أديس أبابا (  إثيوبيا ) عزيز كان قلبه مشغول جداً بربنا لدرجة إنه بعد ما وصل لوظيفة مرموقة جداً في البنك الأهلي المصري ترك الوظيفة و كرس حياته من أجل خدمة القرى والنجوع اللي مافيهاش كنايس لدرجة إنه كان بيسافر من الجيزة لقرى القناطر الخيرية على حدود محافظة المنوفية في الوقت اللي كان السفر فيه صعب جداً
عزيز كان أول واحد يخترع فكرة  مهرجان_القرية وكان يسافر يجمع الولاد بالعربيات وقتها ودة كان امر مكلف جداً عليه إلا إنه كان متحمل مسئولية رسالة المسيح اللي لازم توصل للكل ماكنش إهتمامه بصفوة الكنيسة والطبقات الراقية اللي فيه مليون واحد بيخدمها تودداً ليها لكن كان إهتمامه بالفقراء اللي في القرى والنجوع اللي مش لاقيين حد يكلمهم عن المسيح
إشتياق عزيز لربنا مانتهاش عند مرحلة التكريس لكن نار الحب الإلهي أكلته فراح لأب إعترافه وقتها اللي كان  أبونا_مينا_المتوحد ( البابا كيرلس السادس فيما بعد ) وطلب منه إنه عاوز يترهبن وفعلاً أبونا مينا رهبنه في كنيسة مارمينا مصر القديمة بإسم (  الراهب_مكاري ) وقتها كان ممكن راهب قسيس يرهبن راهب طالما هو كاهن ويقدر يصلي عليه أوشية الراقدين أمام المذبح
المهم أبونا مينا المتوحد أرسل أبونا مكاري لتعمير دير الأنبا صموئيل وأرسل معاه راهب تاني. الراهب دة يبقى  أبونا_متى_المسكين وراحوا الإتنين يعمروا دير أنبا صموئيل وبعدها أبونا مينا بعت ابونا مكاري لدير السريان وبعد نوال الكهنوت تحول الشكل الرهباني من #صموئيلي_لسرياني وفي الوقت دة أرسله البابا يوساب الثاني هو و  ابونا_صليب_سوريال لأمريكا لحضور مؤتمر مجلس الكنايس العالمي ودي كانت أول مرة تخرج الكنيسة القبطية من عزلتها عن الكنايس من سنة 451 ميلادية بعد الإنشقاق الكبير.
لما إعتلى قداسة البابا كيرلس السادس السدة المرقسية طلب إن أبونا مكاري يكون سكرتيره وكان بيتحمل مهام دبلوماسية صعبة جداً. وفي سنة 1962 رسمه قداسة البابا كيرلس أسقف للخدمات العامة والإجتماعية بإسم الأنبا صموئيل مع أخوه في الرسامة نيافة أنبا شنودة أسقف التعليم والمعاهد الدينية ( قداسة البابا شنودة التالت )
كان أهم شئ في خدمة الأنبا صموئيل هي الناس اللي ليس لها أحد يذكرها هما أخوة الرب البنات اللي هاتتجوز ومحتاجة خدمة القرية. المرضى والغير قادرين المدمنين وعلاجهم وغيره وغيره من الخدمات اللي مع الأسف أصبحت الآن مهمشة في كنايس كتير ( طبعاً مش كل الكنايس لكن في كتير منها اصبحت مهمشة )
لما حصل إن السادات أمر بالتحفظ على قداسة البابا شنودة في سبتمبر 1981 السادات عين 5 أساقفة من المقربين للبابا وكان دة في محاولة لزعزعة سلام الكنيسة بعدما إعتقل عدد من الأباء الأساقفة والكهنة والخدام وكان من لجنة الخمس أساقفة أنبا صموئيل اللي هو أخو البابا شنودة في الأسقفية
ركزوا بقى في الكلمتين اللي جايين دول.
اللي هاحكيه دلوقتي حكاه بالدموع نيافة الأنبا باخوميوس مطران البحيرة ربنا يديه الصحة وطول العمر صدقوني حكاه بالدموع قال إنه كان مع أنبا صموئيل ليلة العرض العسكري. فالأنبا باخوميوس سأله وقاله : نيافتك هاتروح يا انبا صموئيل؟؟؟؟ فالأنبا صموئيل قاله لازم أروح يا أنبا باخوميوس لازم أروح علشان  سلام_الكنيسة
لو كان أنبا صموئيل مارحش كان ممكن السادات يفتكر إن الكنيسة بترد الضربة للسادات وتدخل الكنيسة في عهد صعب وخالي من السلام ومع الأسف لما  الزمر صوب السلاح ناحية السادات شاف نيافة الأنبا صموئيل فضربه بالعند طلقة ناحية القلب وطلقة في الساق
أنبا صموئيل لفظ أنفاسه الأخيرة لما وصل المستشفى وكان أخر 3 كلمات قالهم.
الريس_بخير؟؟؟؟
أنا_عندي_السكر
دة_رقم_تليفون_أخويا.
وفاضت روحه الطاهرة بسلام وحزن البابا شنودة للغاية على فراق أخوه أنبا صموئيل ومع الأسف ناس كتير خونت انبا صموئيل وهما يعرفوش إنه مات وكل تفكيره في سلام الكنيسة
اللي عاوز أقولهولكم من القصة دي بلاش نحاول نظلم حد وأحنا مانعرفش الحقيقة. تقصوا الحقيقة وأتأكدوا. لأننا مانعرفش اللي احنا بنظلمه ده كان بيعمل ايه بينه وبين ربنا


منقول











شارك بتعليقك
فيسبوك ()


احجز الان فى العاصمة الجديده تليفون 00201123000014

كتب بواسطة emil
تنوية هام: الموقع غير مسئول عن صحة ومصداقية الخبر يتم نشره نقلاً عن مصادر صحفية أخرى، ومن ثم لا يتحمل أي مسئولية قانونية أو أدبية وإنما يتحملها المصدر الرئيسى للخبر. والموقع يقوم فقط بنقل ما يتم تداولة فى الأوساط الإعلامية المصرية والعالمية لتقديم خدمة إخبارية متكاملة.