الحق والضلال الحق والضلال
البحث


خرجت جري من عند دكتور عادل وبفكر في مليون طريقة انزل بيها الحمل.. حمل اسود الجزء 2

منذ 3 اسابيع
November 14, 2019, 12:37 pm بلغ
خرجت جري من عند دكتور عادل وبفكر في مليون طريقة انزل بيها الحمل.. حمل اسود الجزء 2

حمل اسود للكاتب مصطفي مجدي 

انا اندهشت ومبقتش عارفة اعمل ايه، كل اللى عملته انى خرجت جري من عند دكتور عادل وبفكر في مليون طريقة انزل بيها الحمل، ولان ماليش اهل وعايشة لوحدى في بيت طويل عريض كان جايبهولى واحد من الاغنياء اللى نمت معاهم هدية.
اول ماروحت نمت على طول وبعدها بدقايق حسيت بوجع رهيب فى بطنى، بدأت اتنبه وافتح عينى وامسك بطنى واصرخ من الالم لكن محدش من الجيران سمع صوتى
ياناسالحقونىبطنى بتتقطع هموووووت
مفيش حد خبط عليا الباب حتى يشوف مالى ولا كأنى فى الصحرا
بطنى وجعها عمال يزيد وعمالة تكبر قدامى وانا مش مستوعبة اى شئ غير اني عايزة الوجع ده يروح.
بعد ثوانى حسيت بهواء شديد فى الاوضة رغم انى قافلة كل الشبابيك واحنا اصلا في الصيف والدنيا حر جدا، جريت على الدولاب شديت ملايه اتغطى بيها ،وحطيتها على جسمى وانا بتكتك من البرد، الوجع فى معدتى قل كتير عن الاول، يادوب حبيت اريح على السرير شوية بصيت فى ساعة التليفون لقيتها 3 الفجر حطيت التليفون تحت المخدة وحاولت اغمض عينى لانى حاسة بصداع رهيب، لقيت باب الشقة عمال يخبط جامد وكأن البوليس بيدور عليا في جريمة قتل، مشيت بحذر وببطء ناحية الباب، وبصيت من العين السحرية، لقيت اللى بتخبط واحدة جارتى ساكنة فى الشقة اللى قدامى،كنت لابسة قميص نوم شفاف ولان سعاد جارتى متعرفش حاجة عن طبيعة شغلى الحقيقية، وكل اللى تعرفه انى متجوزة وجوزى مسافر وبييجي كل كام سنة مرة، روحت لبست الروب وفتحتلها، اول مافتحت الباب قالتلى بلهفة
انتى كويسة يااختى؟ انا حسيت بصوتك خرم ودنى، انا قولت ان جوزك جه وبيضربك ولا حاجة
. لا ياسعاد ده بطنى كانت واجعانى بس الالم كان رهيب
ليه يااختى كفى الله الشر؟
. فاكرة لما مكنتش بايته هنا كام يوم من خمس شهور؟
اه يااختى لما قولتيلي سافرتى لجوزك
. شكلى كده حامل
يامليون بركة يامليون سعادة، خشي يااختى ارتاحى،تعالى اسندك لغاية الاوضة
شكرا ياسعاد مش عايزة اتعبك
. ابدا والله مااسيبك غير على سريرك
اصرت تدخلنى الاوضة وبعد ماوصلتنى للسرير قالتلى
.هعمل شاي واعملك معايا
فردت ضهرى على السرير ويادوب لحظات لقيتها بتصرخ من المطبخ، قومت جري عليها لقيت النار مسكت فى كل مكان، سعاد مسكت حتة قماش وعماله تحاول تطفي الحريقة بيها مش عارفة لحد مالنار جت على ايديها واتحرقت، دخلت زقتها بره المطبخ، سكان العمارة اتلموا بسرعة حوالينا، واحد منهم جري يجيب طفاية حريق، وواحد اتكعبل فى باب المطبخ، فاتقفل عليا وانا جوه الحريقة، النار حواليا فى كل مكان، جسمي سخن وبقى احمر حسيت بان قميص النوم اللى لابساه بيسيح من على جسمى والنار دخلت على جلدى، قعدت اصوت من المنظر اللى شوفته وبطنى عمالة تنبُض، واحد من السكان زق باب المطبخ بحديدة، لقى النار مسكت فى كل جسمي، مش قادرة انسى تعبيرات وشه وازاى كان باصص لبطنى ومركز معاها اكتر من النار ومندهش.


بطنى كان باين منها مخلوق غريب اقرب للحيوان اكتر من الانسان وشه طويل ومدبب وكأنه على هيئة ذئب او حاجة لكن كان كله مليان شوك، انا حاسة بالشوك بتاع راسه على جلد بطنى من بره، جاري منزلش عينه من على بطنى لحد ماجارى التانى جاب طفايه الحريق وزقه من قدام باب المطبخ وطفى الحريقة.
سعاد جريت على الاوضه التانية تجيبلى هدوم استر بيها نفسي وكل الرجالة خرجوا بره باب الشقة وطبعا سامعاهم وهما بيلسنوا عليا وعلى جسمى بالكلام وبيهزروا مع بعض رغم ان مش وقته الكلام الفارغ ده، واللى كان مدقق فى بطنى اوى ومندهش سامعاه وهو بيحلفلهم مليون يمين انه شاف وحش فى بطنى وعمال يقولهم النار مسكت فيها وسيحت قميص النوم وهي مجرالهاش حاجة، دى اكيد مخاوية.
وفى لحظة الصوت سكت وسمعتهم بيقولوا، الحقوها هاتولها شوية مياه.
لبست بلوزة وبنطلون برمودا جابتهولى سعاد من الدولاب وخرجت جري ابص على مين اللى اغمى عليه، تقريبا واحدة جارتنا بس انا معرفهاش، جبتلها برفيوم ومياه، وجوزها كان واقف من الصدمة فضل مبلم ولا اتحرك من مكانه وتقريبا ده اللى كان متابع بطنى وشاف اللى جواها، نسوان البيت قعدت تحاول تفوقها، واول مافتحت عينيها بصت لوشي، وقعدت تصرخ وتعيط وكأنها فى حالة هيستيرية، جوزها شالها وخرجوها من الشقة على شقتها اللى فى الدور التالت وهي عمالة تصوت وتقول، انا شوفتها بعيني، انا شوفتها بعينى.
تانى يوم محدش من الجيران خبط يطمن عليا، ولا حتى سعاد، وقررت انى اعدى عليها اشكرها على وقفتها جنبي واطمن عليها لاحسن يكون تعبت وده السبب اللى خلاها متطمنش عليا.
خبطت عليها، فتحلى عيل من عيالها، فبتقوله مين؟
رد عليها بتلقائية ، طنط جارتنا اللى بابا قالك انها اتحرقت ومحصلهاش حاجة
طبعا كنت فى نص هدومى، لكن سعاد خرجت جري وقالتلى
انا اسفة يا حبيبتي، ده عيل صغير مش فاهم حاجة
. ولا يهمك انا بس قولت اجى اطمن عليكي وامشي على طول
كتر خيرك يا حبيبتي، انا اللى كان مفروض اجى اطمن عليكى بس جوزى امبارح كان اجازة ومعرفتش اعدى عليكى، هخلص ترويق البيت وهجيلك اقعد معاكي شويه
بعد شوية دخلت عندى الشقة وقعدت وفضلت ساكتة وكأنها مستنيانى افتح معاها اى كلام يخص موضوع الحريقة، حبيت اريحها وقولتلها
شايفاكى مش على بعضك وعايزة تقوليلي حاجة
. فعلا عندك حق يااميرة، بصي يااختى العمارة كلها بتتكلم عليكي وعلى اللي حصل فى الحريقة وبيقولوا ان انتى مخاوية و
سكتت سعاد مكملتش، مسكتها من ايديها وقولتلها
قوليلي كل حاجة ياسعاد، متخبيش عنى حاجة
. بصراحة يااختى سكان العمارة اتفقوا يجيبولك حد بيفهم فى السحر والكلام ده ويخبطوا عليكى مفاجأة ويشوفوا في اى حاجة فى شقتك وفيكى ولا لأ
معرفتش ارد عليها اقولها ايه وفضلت ساكته، لحد ماقالتلى
انا اسفة يااختى حقك عليا، انا مضطرة امشي.
خرجت سعاد وحسيت بشوك فى بطنى، برفع البلوزة لقيت فيه شوك خارج من جلد بطنى ودم اسود عمال يسيل، حطيت ايدى على بطنى اتجرحت ونزل منها نقط دم لكن احمر، اتخضيت جدا، نزلت وجرى ركبت عربيتى، مفكرتش حتى اشيل الدم من على جسمى وهدومى،وروحت لدكتور عادل، دخلت عليه من غير استاذان، كان عنده بنت شمال بيسقطها بس كان لسه هيبدأ، اول مادخلت عليه قولتله وانا منهارة وبعيط
الحقنى يادكتور عادل، الحقنى
بص للبت وقالها
. اطلعى استنينى بره
وشاورلى علشان انام على الشيزلونج، وقالى:
اقلعي هدومك لما اشوف في ايه، على الله تكونى سقطتى ونخلص
قلعت وقعدت على الشيزلونج، حط ايده على الدم اللى على بطنى وخد منه عينة وبعد كده قعد ينضفه، وهو بيقولى
. اول مرة اشوف دم اسود بالشكل ده
بعد مامسح بطنى بالقطن، لقى مفيش اى اثر لندبات او شوك، او اي حاجة تجرحنى وتنزل الدم ده كله
حط چيل على بطنى وحط عليها جهاز السونار، قعد دقايق عمال يبص، ونظرات وشه غريبة بشكل غير طبيعى، فسألته
. طمنى يادكتور عادل، هو انا سقطت الزفت ده ولا لأ
بصلى شوية وهو ساكت وقالى
قومى البسي هدومك وروحي يااميرة
. اقوم البس ايه، مش هتحرك قبل مااعرف فيه ايه
ربنا يعدى حملك على خير يااميرة
قومت من مكانى ومن غير ماالبس هدومى مسكته من البالطو وقولتله بصوت عالى
بقولك قولى انا حامل في ايه
زق ايدى ومسكها جامد وقالى
.انتى حامل في
يتبع











شارك بتعليقك
فيسبوك ()


احجز الان فى العاصمة الجديده تليفون 00201123000014

كتب بواسطة Shero
تنوية هام: الموقع غير مسئول عن صحة ومصداقية الخبر يتم نشره نقلاً عن مصادر صحفية أخرى، ومن ثم لا يتحمل أي مسئولية قانونية أو أدبية وإنما يتحملها المصدر الرئيسى للخبر. والموقع يقوم فقط بنقل ما يتم تداولة فى الأوساط الإعلامية المصرية والعالمية لتقديم خدمة إخبارية متكاملة.