مسلمه دافع عنها الأنبا أبيفانيوس ضد رجل دين مسيحي ترد له الجميل و تكتب كلام اكثر من رائع عنه يا ريت كل رجال الدين في اي دين يكونوا مثله

كتب جورج خاص لموقع الحق و الضلال

ما أن أنتشر خبر مقتل رئيس دير أبو مقار الأنبا ابيفانيوس إلا ووجدنا الجميع يتسابق في تدوين مواقف رائعه له مع القديس المتنيح
و ذلك لما له من معرفه و ثقافه و علم كان يشهد بها له الجميع
الغريب في الأمر أن الشهادات التي أتت في حق الأنبا ابيفانيوس لم تأتي فقط من أقباط و لكن و جدنا العديد من أخوتنا المسلمين الذين ربطتهم مواقف مع نيافته يكتبون ويدونون كلام أكثر من رائع عن نيافته
واحده من هؤلاء هي باحثه في مجال الأثار كتبت عبر صفحتها الشخصيه ما يلي :
" ما كنتش أعرفه يمكن بسمع عنه بس. وفي يوم مؤتمر التراث العربي المسيحي 25 واللي كان أول مؤتمر لي في جمعية اللاثار القبطية بالكنيسة البطرسية وكنت في أول جلسة، عرفت أنه هيكون رئيس الجلسة بتاعتي.بصراحة كنت خايفة شوية أول مرة يكون رجل دين هو رئيس جلستي وخفت اقول حاجة تأخذ على. وبعدين لما جه دوري وقعدت جنبه وجه علشان يعرفني لقيت ابتسامة جميلة على وشه وبعدين لما قرأ مؤهلاتي لقيته ضحك وقالي كل ده!! عظيم. وبعدين قمت وبدأت أشرح موضوعي وكان بيتابع كلامي باهتمام ولما اقول حاجة طريفة الاقيه ابتسم ابتسامة كبيرة. وبعد ما خلصت شكرني وهناني. الموقف الحقيقي اللي بان لي فيه. ان في فترة التعليق على الابحاث قام أحد الاباء ووجه لي نقد على نقطة معينة وهو لاحظ أن معالم وشي اتغيرت شاور لي وقالي مش أنت جايبه الجزء ده من مرجع؟ قلت له اه . قالي قولي اسم المرجع وأن الكلام ده مش من عندك. ساعتها استغربت موقفه وانه دافع عني بس حسيت ساعتها اد ايه هو فعلا رجل دين حقيقي وانسان وعارف يعني ايه طالب علم والمفروض مساعدته مش مهاجمته!!!

يا ريت كل رجال الدين في اي دين يكونوا بنفس السماحة والبشاشة والعلم اللي كانت عندك.

البقاء لله وربنا يرحمك ويجازيك خير عن كل الخير اللي عملته."