الحق والضلال الحق والضلال
البحث


من لا يحب اخية الذي يراه فكيف يحب الله الذي لا يراه .. مسيحي يبهر الجميع بما كتبه قبل شهر رمضان

منذ 1 شهر
April 17, 2020, 4:20 pm بلغ
من لا يحب اخية الذي يراه فكيف يحب الله الذي لا يراه .. مسيحي يبهر الجميع بما كتبه قبل شهر رمضان

مواضيع عامه
كل سنة وإحنا كلنا طيبين وبخير أيوة كل سنة وإحنا بنحب بعضنا أكتر وأكتر يا محمد يا مينا يا بولس يا مصطفى، اوعى تنسى أن أبونا وأمنا واحد هما آدم وحواء، يعنى إحنا واحد وغرض الله من خلقه لينا جميعا واحد، أن ننشر المحبة والقداسة والرحمة وعمل الخير فى الأرض. 
 
أنا مسيحى بحبك جدا يا محمد زى ما علمنى المسيح من لا يحب أخيه الذى يراه فكيف يحب الله الذى لا يراه، أنت بتحبنى زى ما علمنا سيدنا محمد حب لأخيك كما تحب لنفسك، أيوة يا جماعة الحب سلام فرح خير بناء تعمير رخاء أمن، تعالوا نعيش شهر الخير والكرم نصلى ونقرأ القرآن والإنجيل ونجمع الصليب والهلال، تعالوا نحضن بعض بالحب فى صلاة التراويح، تعالوا ندعى ونصلى لبعض فى صلاة الفجر. 
 
أنا المسيحى أجيلك يا أخويا محمد أجهزلك الفطار وأعملك العرقسوس، وكمان يا أهل بلدى يا جيرانى يا حبايبى يا أصدقائى أنا أعملكم فطار فى قاعة الكنيسة نفطر مع بعض علشان السماء تفرح بمحبتنا وعلشان نغيظ إبليس بالحب وعلشان نعلم أولادنا إننا واحد، أيوة نجيب أطفالنا معانا يجلسوا فى وسطينا ويشوفونا وإحنا بنفطر بالحب مع بعض، اوعى يا ابنى يا محمد أنت ومينا تصدقوا الشيخ أو القس اللى يقولك اقتل أو اكره، يا ابنى الله منزه عن الشر، الله مصدر كل نور وسلام ومحبة وخير، الشيطان هو اللى بيأمر بالقتل والشر والكراهية، يا أولادى خليكم ذى أجدادنا مكنوش يعرفوا حاجة اسمها مسيحى ومسلم. 
 
الحاجة دا دخيلة علينا، الخارج بيحاول يفهمنا إننا اتنين مش واحد علشان يضيعنا ويخرب بلادنا ويفتتنا لكن أبدا مش هيقدر علينا، إحنا دم واحد وعرق واحد، دمى هو دمك وعرقى هو عرقك، شرفى هو شرفك وأرضى هى عرضك، وأولاد هما عيلتك، أبدا هنفضل واحد نعبد الله الواحد نعيش فى الوطن الواحد ونأكل فى طبق واحد، نتعلم فى مدرسة واحدة، ونسكن فى عمارة واحدة، ونمشى فى شارع واحد، ونزرع زرع واحد ونشتغل فى مصنع واحد.
 
أبدا مفيش حد يقدر يفرقنا إلا الموت، حتى الموت هنشيل بعض وندفن بعض ونأخذ عزاء بعض، أنا بحب رمضان، بحب اللمة والروح الحلوة، بحب السهرة والمسلسلات، بحب الصلاة والتراويح، بحب كعك وصلاة العيد، بحب روح مصر اللى ساكنه جواك يا مينا أنت ومحمد، بحب البابا وشيخ الأزهر، بحب الكنيسة والجامع، بحب مصر أم الدنيا، واللى هتبقى أد الدنيا إنشاء الله، كل الإخوة المسلمين فى مصر وكل بقاع الأرض كل سنة وأنتم بخير.
 

هذا الخبر منقول من : اليوم السابع














اهم الاخبار
شارك بتعليقك
فيسبوك ()


موضوع مثبت

كتب بواسطة Shero
تنوية هام: الموقع غير مسئول عن صحة ومصداقية الخبر يتم نشره نقلاً عن مصادر صحفية أخرى، ومن ثم لا يتحمل أي مسئولية قانونية أو أدبية وإنما يتحملها المصدر الرئيسى للخبر. والموقع يقوم فقط بنقل ما يتم تداولة فى الأوساط الإعلامية المصرية والعالمية لتقديم خدمة إخبارية متكاملة.