موقع الحق والضلال موقع الحق والضلال

معجزة في ليلة عيد استشهاد ابوسيفين يوم 3 ديسمبر

منذ 3 شهر
December 4, 2020, 3:16 pm
بلغ



* في يوم كان ليلة عيد استشهاد ابوسيفين يوم 3 ديسمبر كان في واحد ومراتة ومعاهم ولادهم راجعين من الدير مبسوطين و رايحين بيتهم اللي في الازاريطة/ الاسكندرية.
وكان الجو في اليوم دة سيئ جدا وامطار غزيرة مغرقة الشوارع، وهو الراجل ده كان ماشي بالعربية بمحاذاة البحر وكانت امواجة تتلاطم والمياه بتندفع بشدة للشارع، وكان الطريق مزحلق وهو اساسا اتجاة واحد وفي سبورتج لقيو عربية كارو عليها سلم حديد، اللي بيعملوا بيه اعمال الكهرباء، وكانت جاية من الاتجاة المعاكس ولو اتخبطوا فيها هتقسم العربية نصين فعشان يتجنبها اضطر ينحرف لكن عشان كان بيسوق بسرعة وحالة الارض اللي كانت عاملة زي الصابون من كتر الامطار، اندفعت العربية بشدة لنصف الشارع، والحمدلله مكنش في عربيات جاية وراهم وإلا كانت هتطيح بعربيتهم .( ودي كانت اول معجزة ).
وبعدين حاول يرجع العربية للطريق تاني، راح لقي العربية بتندفع بشدة وقدامها عمود كهربا كان هيقسم العربية لكن فوجئ ان العربية طلعت علي الرصيف بقوة واتعلقت علي العجلات الخلفيةفا بقي نصها فوق الرصيف والنص التاني تحته والعربية وقفت قبل العامود بمسافة صغيرة جدا. ( ودي كانت المعجزة التانية).
حاول يشغل العربية لكن مفيش فايدة فإزاي هيرفعها وينزلها وهو لوحدة ومفيش حد حوالينهم، وازاي يروح يجيب ميكانيكي في الجو السيئ دة والاطفال معاه؟!. فا وهو قاعد بيفكر ومحتار مش عارف يتصرف ازاي لقي شاب جاي ناحيتهم فجأة وقعد يهدي فيه ويقوله:
"متخافش متخافش، ماتقلقش علي العموم انا عارفك"
راح الراجل سأله: تعرفني منين؟
راح شاور بإيدة ناحية الخلف
فقاله: انت قصدك من كنيسة مارجرجس؟ علشان هي موجودة فعلا خلفهم.
لكن الشاب دة مجاوبش وقاله مرة تاني: انا عارفك.
وبعدين بص علي شباك العربية علي الاطفال وكانوا مرعوبين جدا فقالهم: متخافوش متخافوش.








وفضل واقف معاه وبعدين قاله: ادخل العربية وشغلها.
فدخل الراجل وحاول يشغلها لكن مفيش فايدةفراح قاله: احنا هنجيب ميكانيكي لكن لازم ننزلها الاول من علي الرصيف.
فسأله الراجل: طيب هنزلها ازاي؟
قاله: متقلقش وشاور بصباعه فبيبص الراجل لقي في اربع عربيات جايين ، وقفوا ونزل منهم ناس ، ولما جية يرفع العربية معاهم قاله:
" لا، سيبهم هما هينزلوها متشيلش انت" فتعجب جدا الراجل علشان هو فعلا كان عامل عملية غضروف في الظهر وكان ممنوع من شيل اي حاجة تقيلة.
بعدين قالهم الشاب نزلوا العربية من علي الرصيف.
فمراته بتقول انة لما كان واقف الشاب ده وبيحكي مع زوجي بصيت عليه، فلاحظت انه مكنش واقف علي الارض زينا وكان لابس سويتر وبنطلون زي الملابس العسكرية بتاعت زمان ولابس حذاء له طماقات تصل الي منتصف الساق وكان طوله متوسط وشكلة مطابق لصورة الشهيد مرقوريوس الموجودة في الكنيسة في ديرة ولاحظت كمان ان وشة منير جدا وله شارب رفيع وايدية بيشع منهم نور، فذهلت جدا بس مقدرتش تتكلم. وطول فترة وقوفه كانت مدركة تماما ان دة الشهيد ابوسيفين ففضلت تتأمل فيه.
وبعدين راح جاب ميكانيكي كان ولد صغير، قاله يغير العجلة وبعدين قال للراجل: " اركب العربية ودورها و هتوصلك للبيت "
وفعلا اتحركت العربية ووصلوا لبيتهم بسلام .
وفي اليوم التاني لما عاين الميكانيكي العربية اتعجب جدا ازاي اتحركت بيهم فقالهم ان تغيير العجلة مبيساعدش العربية تتحرك بأي وضع فازاي اتحركت ووصلوا بيتهم بسلام؟. ( ودي كانت المعجزة التالتة ).


الله محبة




كتب بواسطة GM

تنوية هام: الموقع غير مسئول عن صحة ومصداقية الخبر يتم نشره نقلاً عن مصادر صحفية أخرى، ومن ثم لا يتحمل أي مسئولية قانونية أو أدبية وإنما يتحملها المصدر الرئيسى للخبر. والموقع يقوم فقط بنقل ما يتم تداولة فى الأوساط الإعلامية المصرية والعالمية لتقديم خدمة إخبارية متكاملة.

احصل عليه من app store تحميل تطبيق الحق والضلال من علي app store احصل عليه من Google Play تحميل تطبيق الحق والضلال من google play