​زوجة في دعوى الخلع بيعايرني بجهازي قدام أهله

”اتحملت كتير منه وإهانته ليا قدام أهله، ويقلل منى لدرجة إنه يعايرني بجهاز فرحي، وإن أهلي جابولي حاجات مش كويسة، على الرغم والله أهلي اشتروا فوق إمكانياتهم، لكن هو مش بيقدر وكمان الكلام بيبقى قدام اخواته وأهله، لحد ما الكل بقى يبص لى نفس نظرته غير الشتيمة على أهلي وكأننا أجبرناه على الجوازة” تلك الكلمات خالطت لسان نسمة من داخل محكمة الأسرة لرفع دعوى خلع من زوجها بعد 11 شهرا من الزواج، مؤكدة استحالة العشرة معه.
وروت الزوجة قصتها: ”بعد ما خلصت جامعة اتقدم لي شاب بيشتغل فى شركة وهو حقيقى ‘نه أعلى مننا فى المستوى المادي، لكن هو عارف كدا لما اتقدم واتفقنا على كل حاجة، ووالدى قال هيجيب اللى فوق قدرته كمان، وهو وافق وكنت فاكرة إنه هيقدرني وشاريني لكن للأسف بعد ما اتجوزنا وخلص شهر العسل بدأت معاملته تتغير معايا، ويعايرني بجهاز والدي وحالتهم المادية قدام أهله واخواته، كنت بموت من الكسوف وهو بيعاملنى كأني شغالة فى بيتهم مش مراته، وبدأت الخناقات بيننا وهو بدأ يتطاول عليا بالشتيمة وإهانة أهلي، كنت بموت من كلامه معايا وقد ايه أنا رخيصة”.
وأضافت الزوجة: ”كنت منتظرة إن حد من أهله يتكلم معاه ويرجع له عقله، لكن لقيتهم مؤيدين ليه ويفضلوا يتريقوا عليا معاه، لدرجة إني بقيت ببعد عنهم وفقدت الثقة فى نفسي لدرجة إني بخاف أقعد معاهم، عشان كدا طلبت الطلاق ورفض عشان كدا رفعت دعوى خلع بمحكمة الأسرة ومازالت الدعوى منظورة أمام القضاء”.
نقلا عن السلطه