الخيانة اللى اتسببت فى شلل جورج سيدهم واعتزاله التمثيل

منذ 2 شهر
November 6, 2021, 9:26 am
بلغ
الخيانة اللى اتسببت فى شلل جورج سيدهم واعتزاله التمثيل

محدش يقدر ينكر أن الصورة اللى ظهر فيها جورج سيدهم على كرسى متحرك كانت صعبة ومؤلمة بدرجة كبيرة، خصوصا أن صورة وصوت جورج عاشوا معانا، من صغرنا، على أنهم رمز دايم للبهجة.وقت ما انتشرت الصورة دى الناس قالت لك ياه ع الزمن، وغدر الزمن ، وافتكر الكل إن اللى وصل له جورج كان نتيجة طبيعية لزحف الأمراض اللى ما بترحمش الإنسان حتى فى أصعب لحظات ضعفه، لكن الحقيقة إن اللى وصل جورج للكرسى المتحرك مكنش المرض إنما الخيانة.

القصة حكاها مقربين من جورج، وقالوا إنه فى فترة من الفترات ومن كتر مشاغله بأعماله، جاب أخوه أمير وقاله أنت هتبقى مسئول عن كل الحاجات المالية والإدارية وأتفرغ أنا للتفاصيل الفنية ، وحصل المراد من رب العباد ومشيت الأيام بيهم زى ما اتفقوا بالظبط، جورج مركز فى فنه وبس وأمير شايل عنه كل حاجة ليها علاقة بالفلوس لحد ما جه يوم صحى جورج مالقاش أمير.





دور جورج على أخوه لقاه فص ملح وداب، تمر ساعات وساعات وده ولا حس ولا خبر، لحد ما اكتشف جورج الكارثة اللى قضت عليه، لما عرف إن أخوه، بموجب التوكيل اللى عمله له باع كل حاجة وهرب برة مصر.

أول ما سمع جورج الخبر حس بأن جسمه كل معدش موجود، ولما جه الدكتور يكشف عليه خرج وهو على وشه ألم وحزن كبير، وقال لأسرته إن جورج اتصاب بجلطة فى المخ اتسببت فى شلل فى النص اليمين، ده بخلاف تأثيرها على مراكز النطق، وده اللى خلاه من وقتها لحد ما مات يتكلم فى مرات قليلة جدا، وكان فى كل مرة محدش بيفهم اللى بيقوله إلا مراته.

تأثير الحادثة على جورج ما وقفش بس عند حد الألم النفسى والجلطة، وإنما خلته يعتزل التمثيل إجبارى وفضل عايش على الكرسى المتحرك بعيد عن الكاميرا لحد ما ظهر فى رمضان 2014 فى إعلان مع سمير غانم وشيرين، ووقتها ناس كتير افتكرت أن جورج ممكن يرجع للوسط الفنى، وإن الإعلان ده مجرد بداية، لكن اللى حصل إنه رجع يغيب تانى، وفضل أنه يحتفظ بصورته عند الجمهور، بدلا ما يشوفوه بالصورة المؤلمة دى، فرجع جورج للكرسى المتحرك اللى فضل عايش عليه يجرجر ذكريات الخيانة اللى قضت عليه لحد ما مات فى 2020.

هذا الخبر منقول من : مبتدأ




كتب بواسطة emil
احصل عليه من Google Play تحميل تطبيق الحق والضلال من علي app store احصل عليه من Google Play تحميل تطبيق الحق والضلال من google play