شباب كتير بيعاني من الجوع العاطفي و إلحاح الاحتياج الجنسي

خاص لموقع الحق والضلال

كتبت مارينا

شباب كتير بيعاني من الجوع العاطفي و إلحاح الاحتياج الجنسي ، بعضهم بيتسرع بسُرعة
و يتجوز فقط لسد احتياجه العاطفي و الجنسي ودي مُصيبة لأن الجوع العاطفي قد يَستمر
بعد الزواج ، و عدم ضبط الاحتياج الجنسي قد يظل يُطارد البعض - خصوصا ً الجسدانيين - حتي
بعد الزواج اومال ايه الحَل ؟

لو سألت اي حد بعيد عن ربنا هيقدملك كل حُلول ابليس المُتاحة ، من علاقات عاطفية للتسلية ، من افلام و مناظر و يمكن علاقات خاطئة او مخدر او كحوليات . الخ

لو سألت واحد عملي هيقولك اتجوز ! مفيش حل تاني وده حل منطقي
بس ناس كتير من اللي اتجوزوا علشان سد الاحتياجات اخدوا فترة بعد الجواز عمالين يشبعوا غرايزهم لحد ما زهقوا وحسوا ان الجنس مش زي ما كانوا متخيلين !!
وان الحب بتاع زمان مبقاش موجود !!
وبعضهم بيصاب ببرود عاطفي وبعضهم ببرود جنسي
بعض الحالات علي العكس مش بتحس بالشبع في بيتها فبتدور عليه برا
و يبقي الجواز محلش المشكلة !!

لو سألت واحد روحاني هيقولك اشبع بالمسيح
طبعا ً انت هتقوله عندك حق ، بس انت مش فاهم يعني ايه تشبع بالمسيح !!
انا عندي احتياج عاطفي ، و جسدي ، عندي طاقة !! اتصرف ازاي !!
اشبع ازاي بالمسيح !!

اقولك ، علشان تشبع جوع و احتياج عطفي ، اولا ً لازم تشبع بالمسيح ، يعني عايزك
تملي نفسك علي أد ما تقدر بالمسيح ، كأنه هو غذاءك صلاة وتناول واعتراف و قراية
وفي الصلاة هتكتشف انك بتقول لربنا محتاج حد يحبني ، هتلاقيه بيقولك حب الناس !
يارب ماشي انا محتاج !!
هو يقولك تسديد احتياجك في العطاء مش في الأخذ !

حب الناس ، قدم عاطفة نقية لكل الناس ، اخدم ، اتعب نفسك لأجل ربنا و لأجل الآخرين ،
تلاقي الضغط العاطفي والجنسي عليك بيخف بالتدريج
اشباع الاحتياج العاطفي بمحبة الآخرين ،
واشباع الالحاح الجنسي بمحبة ربنا و الهروب من الالحاح ذاته وعدم الاهتمام بيه وتجاهله

المحبة نبعها هو الله ، الانسان عندما يتصل بالله يتصل بنبع متدفق من المحبة ،
والمحبة شيء لا يُمتلك ، بينما هو شيء يُعطي

مفهوم ( الزواج هو تأسيس كنيسة ) و انه هو ( الكنيسة التي في بيتك )
لو واضح في اذهان كل المُقبلين علي الزواج مشاكل كتيرة هتتحل ببساطة ،
لأن الزوج و الزوجة هيكونوا عارفين قدر قدسية العلاقة بينهم .
ومش معني ان الغالبية بعيد عن المفهوم الصحيح للزواج المسيحي اننا
نتجاهل الصح ، وننساق ورا المفاهيم السايدة المغلوطة .

الزواج علاقه فريده من نوعها شبهت بعلاقه المسيح والكنيسه خيط مثلوث على اسم الثالوث يجمع طرفين يحملوا اكاليل مجد طريق الجهاد للوصول للحبيب الذى ربطهما