مُعدّة «صبايا الخير» تكشف عن تفاصيل جديدة فى التحقيقات الرسمية
ستكمل الدستور نشر أقوال غرام عيسي، مُعِدَّة برنامج صبايا الخير ، في القضية رقم 2316 لسنة 2018 جنايات السلام، والمتهم فيها كل من الإعلامية ريهام سعيد وأكرم النحاس مُنتج بقناة النهار، وغرام عيسى مُعِدَّة ببرنامج صبايا الخير، ومحمد راضي مُصَوِّر، ومحمد صلاح، وعطية ناصر، ومحمد طه، وإسلام خالد في اتهامهم بـ التحريض على خطف الأطفال، والاتجار بالبشر، ونشر بيانات وأخبار كاذبة .
وخلال التحقيقات قالت غرام : موضوع الإغراء بالفلوس اللي المتهم إسلام قال عليه، كان بتكليف من ريهام سعيد نفسها، وبناء على تعليماتها، وعاوزة أقول إني لم أتقاضَ مرتبات شهر سبتمبر اللي فات من القناة، وأنا كُنت مِبَلَّغة أكرم النحاس بكل حاجة بتحصل أول بأول، وكمان هو بعت معايا محمد صلاح ، وأضافت: أكرم بلَّغني إنه موافق على 250 ألف جنيه .
وأضافت: المحامي محمد حمودة - دفاع ريهام سعيد- اتفق معايا إنهم هيحضروا معايا التحقيق، ومعاهم ريهام، لكن ده محصلش، وأنا مش عاوزه حد من مكتبُه يحضر التحقيقات معايا تاني .
وقالت: المتهم إسلام كان المصدر بتاعي، اللي ادهولي أكرم النحاس، وقال لي أتابع معاه علشان هو اللي هيجيب لنا الشغل، وأي معلومة هتيجي منه هبلغ بيها أكرم، وأنا مش بعمل أي حاجة في الشغل غير لما أرجع لريهام سعيد أو أكرم- في حالة عدم تمكني من الوصول للأولى .
وأكملت: يوم الإتنين- قبل الواقعة- رحت لأكرم وفتحت ليه الـ واتس آب ، وعرضت عليه الدردشة اللي تمت بيني وبين إسلام وقلت له إن إسلام بيقول إن في حد شغال في مستشفى حلوان بيخطف أطفال، وسيبت الموبايل معاه 5 دقائق ورجعت، وبعدها قال لي حلو قوي الموضوع ده، تابعي بقى مع إسلام، ولما يكون فيه جديد بلغيني، بالإضافة إني ماليش أي سلطة في اتخاذ أي إجراء دون الرجوع لريهام سعيد أو أكرم النحاس، وأنا كنت قلت ليهم إن فيه أمين شرطة بيبيع أطفال، فقالوا لي حلو قوي الموضوع، وممكن نراضي الأمين بـ5 آلاف جنيه، وبعد كده ناخد الأطفال نبعتهم على دار أيتام، ولما رجعت لأمين الشرطة، قال عاوز 50 ألف جنيه، وبعد كده قلت لريهام، فقالوا لي تابعي معاه، وبعد كده طلبوا مني تأجيل موضوع أمين الشرطة، ووقتها أنا كنت باكلِّم إسلام على موضوع الطفلين .
وتابعت: مفيش حد في البرنامج بياخد قرارات إلا لما يرجع لريهام سعيد نفسها ، مضيفة: أكرم النحاس في شهر أغسطس اللي فات، قال لي إن في واحد اسمه إسلام تواصلي معاه، وأنا معرفش طبيعة العلاقة بين أكرم وإسلام .
واختتمت: ريهام سعيد قالت للمحامي محمد حمودة: كلهم يتحبسوا أنا ما أتحبسش وكان قصدها عليّ أنا وصلاح وراضي وساعتها أكرم النحاس قال: آه الأستاذة ما تتحبسشى ، وريهام ممكن تضحي بينا كلنا وتلبِّسْنا في القضية .
نقلا عن الدستور