كهربا رفضت اسلم على محمد فضل بسبب مرات مؤمن زكريا
كشف محمود عبد المنعم كهربا، عن رأيه في رحيل رمضان صبحي عن النادي الأهلي وانضمامه إلى بيراميدز.
وقال "كهربا" خلال لقائه ببرنامج "ملعب أون تايم" الذي يقدمه الإعلامي سيف زاهر بقناة "أون تايم سبورت": "لا يمكنني التعليق على رحيل رمضان صبحي فهذا قراره لكن لو جالي وطلب نصيحتي كنت هقوله اوعى تمشي من الأهلي لأنك نجم كبير وابن النادي والجمهور بيحبك ياريتك كنت عملت زي أحمد فتحي لأنه خرج من الباب الكبير وأدى لاَخر الدقيقة وكان هيموت ويلعب نهائي افريقيا وكان على تواصل معايا لحد الماتش".
وتابع: "رمضان لاعب موهوب وكان ممكن يكمل مع الأهلي 6 شهور أو سنة ويرجع الدوري الإنجليزي تاني لأن الأهلي والزمالك متشافين وبيراميدز مش زيهم".
وأضاف أن مروان محسن ومصطفى محمد من أفضل المهاجمين في مصر، مشيرًا إلى أن مروان ليس موفقًا لكنه لاعب كبير.
وعن أحداث مباراة السوبر المصري علق: "والله العظيم ماعملتش حاجة حازم امام زقني قدام الجمهور وتاني كورة طارق حامد دخل عليا جامد وشتمني فشتمته وده عادي واحنا كنا في الزمالك كنا بنشتم بعض عادي جدا وبتبقى نرفزة ملعب وبعديها مفيش أي حاجة بس بنبقى عايزين نكسب وعبد الله جمعة قعد سنة كاملة في الأوضة معايا ولما هو كان رايح ناحية جمهور الأهلي كنت رايح أخده بعيد عن الجمهور لأنى بخاف عليه وهو أخويا الصغير وعمرى ما كنت هضربه وروحت قعدت على الدكة لقيت الحكم بيديني كارت أحمر".
وأردف: "لما دخلنا غرف الملابس ولا حصل أي حاجة ولا ضرب ولا غيره وأنا في الماتش مشتوم ومضروب وأنا مش غلطان ومش عارف اتوقفت ليه لحد النهاردة ونفسي يكون فيه فيديو ليا وجابولي صورة وأنا بكسر البوكس بتاعنا وده عادي زعل من الخسارة".
وعن أزمته مع الكابتن محمد فضل عضو اتحاد الكرة، علق: "هو اللي زقني وأهانني ولو زوجة مؤمن زكريا مكنتش موجودة كنت سلمت عليه بس أنا بتكسف وأنا مليش علاقة بيه ومفيش حاجة بينى وبينه ولما اتصالحنا أنا ما عتذرتش والكابتن محمد بركات والعميد محمد مرجان كانوا موجودين وقولتلهم أنا مش هقول آسف لكن هقول أنت زي أخويا الكبير وخلاص "وقلت له أنا مش شايل منك في حاجة".
وأضاف: "هناك فرق في السيستم بين الأهلي والزمالك، في الزمالك كنت واخد راحتي ولما بتأخر عن التمرين عادي في الأهلي صعب اتأخر 5 دقايق إنما في الأهلي مفيش تأخير والتدريب بالثانية وسيد عبد الحفيظ دايمًا قريب من اللاعيبة، أما في الزمالك لو قلت عن مشاكلك او ايه اللى مضايقك كانت بتطلع بالليل على الفضائيات".
وعن حقيقة أزمته محمد الشناوي وتغريمه مليون جنيه، قال: "عمري ما اتخانق مع كابتن سيد عبد الحفيظ والموضوع كان بيني وبين الشناوي في أوضة اللبس وكان هزار تقيل شوية وشدينا مع بعض والموضوع اتقفل لكن هو طلع للإعلام بشكل غير طبيعي علشان أنا في الموضوع وبيحصل مليون سيناريو وحوار".
هذا الخبر منقول من : موقع فيتو
الله محبة