طريقة عمل البوريك في البيت زي الجاهز وأحلى.. بمكونات بسيطة وحشو لذيذ

بتحبي المخبوزات الطازة على الفطار، أو عايزة سناك سريع وصحي لأولادك، يبقى طريقة عمل البوريك هتكون اختيارك المثالي. وصفة سهلة، ومكوناتها موجودة في كل بيت، والنتيجة بوريك هش وطري بحشو جبن يذوب في الفم.

طريقة عمل البوريك.. المقادير

مقادير العجينة:

- نصف كيلو دقيق أبيض

- نصف كوب ماء دافئ للعجن، وممكن تزودي شوية لحد ما العجينة تلم

- نصف كوب خليط زيت على زبدة، مدفيين على النار

- رشة ملح

- رشة ينسون

- كيس خميرة فورية 12 جرام

- ربع كيس بيكنج بودر

مقادير الحشو:

- 125 جرام جبنة شيدر نيوزلاندي

- 100 جرام جبنة موتزاريلا مبشورة

- معلقتين لبن

- زيتون متقطع صغير جدا

- سوسيس أو لانشون متقطع صغير جدا حسب الرغبة

- بقدونس مفروم

- فلفل أسود

- معلقتين زيت

- زعتر يابس
 

- فلفل أخضر متقطع صغير جدا

طريقة عمل البوريك خطوة بخطوة

أولا: تجهيز العجينة

في بولة كبيرة، حطي الدقيق، وضيفي عليه الزيت والماء بالتدريج، وبعدها البيكنج بودر وباقي المكونات.

في كوباية صغيرة، دوبي الخميرة مع معلقة سكر في ربع كوب ماء دافئ، وسيبيها نص ساعة لحد ما تعمل رغاوي، وبعدين ضيفيها على العجين.

اعجني لمدة 10 دقائق لحد ما العجينة تتجانس وتبقى متماسكة ومش بتلزق في الإيد، غطيها بكيس وعليها فوطة صوف، وسيبيها تخمر ساعة كاملة.

ثانيا: تجهيز الحشو

اخلطي كل مكونات الحشو مع بعض كويس، وفي الآخر ضيفي السوسيس أو اللانشون وقلبي تاني.

ثالثا: تشكيل البوريك

قسمي العجينة لكرات صغيرة بحجم كرة البينج بونج، وغطيها تاني. افردي كل كرة باليد وبعدين بالنشابة، وخلي سمكها متوسط مش رفيع أوي.

حطي الحشو بطول العجينة، واقفلي الطرفين زي القطايف واضغطي عليهم كويس.

ادهني صينية فرن بشوية زيت، ورصي فيها البوريك مع ترك مسافة بين كل واحدة والتانية لأن حجمها هيزيد، وغطيها نص ساعة.

رابعا: التسوية

سخني الفرن قبلها بربع ساعة. دخلي الصينية في الرف اللي تحت على درجة حرارة 180 أو 200 لمدة ربع ساعة، وتابعيها كل شوية.

أول ما تلاقي البوريك بيتحرك من مكانه يبقى استوى. ادهني الوش ببيضة، ورشي سمسم أو حبة البركة حسب الرغبة.

شغلي الشواية ودخلي الصينية 5 دقائق لحد ما الوش يبقى دهبي.

نصيحة للتخزين

ممكن تحتفظي بالبوريك في الفريزر، ولما تحتاجيه سخنيه في الفرن دقيقتين بس، وهيرجع طازة زي أول مرة.

وبكده تكوني عملتي طريقة عمل البوريك في البيت بطريقة سهلة وناجحة، وتقدميه لأولادك بأمان ونضافة، وبطعم أحلى من الجاهز.