أطرف ذكريات رواد «فيس بوك» في الطفولة
مزة ابتدائي
قال محمد: "طابور 7 ونص الشنطة اللى كانت بتكسر ضهر الواحد والزمزمية اللى كنا بنشرب زمايلنا في الفصل بغطاها براعم الإيمان برنامج تعده وتقدمه هاجر سعد الدين عمو فؤاد كلمتين وبس سندوتشات الطعمية من عبلة اللي على أول الشارع عالم سمسم بوكيومون القناة الأولى نشرة الساعة تمانية ومسلسل 9 وفيلم السهرة مواقف وطرايف واختارنا لك ونيس ومايسة اللبس الغريب اللي أمك كانت بتلبسهولك ضرب الجرس على كل بيوت الشارع واجري يامجدي البنت اللي كان الفصل بيحبها في ابتدائي النط من على سور المدرسة وقلب الدروس بلايستيشن 1.أمبوما وبتستوتا ".
بكار ولمة العيلة على الفطار
واستكمل محمود: "نيجي بقى للشهر الكريم رمضان جانا وفانوس رمضان ومرحب شهر الصوم مرحب لياليك عادت في أمان بعد انتظار وشوقنا إليك جيت يارمضان أذان المغرب والبلح والتمر على الفطار وصلاة التراويح بكار لمة العيلة على الفطار إبراهيم نصر والكاميرا الخفية الحاج متوليحديث الصباح والمساء ليلة الواقفة ولبس العيد وياليلة العيد أنستينا والعدية المسدسات الخرز والصواريخ اللى كنت بنزاول بيها الجيران، يالله على الأيام اللي الواحد مكنش حاسس بيقميتها".
يوم الإجازة مع جدو
وتذكرت آية: "أجمل سنين عمري يعني جدو الله يرحمه، يعني يوم الخميس أروح له بعد المدرسة ويستنانى نتغدى مع بعض ويجيب لى القصب ويخبيه ورا الباب ويوم الجمعة ولما نرجع من الصلاة لحد بليل العيد ولمتنا معاه على الفطار في أول يوم ولما نرجع من الصلاة نلاقيه مستنينا وكنافة جدو اللي لازم تروح له قبل الصلاة الامتحانات ومكالمته ليا بعد الفجر ويقولى بدعيلك بس عشان خاطري نامي شوية وثقتى ويقينى اني هنج واجيب مجموع عشان دعوته بس آخر يوم امتحانات ولما يكلمنى قبلها ويقولى عاوزة تتغدى ايه هستناكى واعملى حسابك مش هتشوفى بيتكوا تانى يعني ياخدنى في حضنه جدو حاجات كتير واحلى أيام وأحلى ذكريات ممكن الواحد يعيشها ربنا يرحمه ويخليكي ليا يانينه".
المغامرون الخمسة
وأضافت دعاء:" فاكرة زمان وأنا صغيرة كنت بعشق كرتون المغامرون الخامسة وخصوصا أغنيته كنت بحب أنزل عند تيته في الشارع العب بالسكوتر بتاعى اللى كان لونه أخضر وسريع الاتارى وشرايطة اللي كنت بتخانق عليها أنا وشاديى كنت بعشق كاراتيه جوليو وماريو ولا البسكوت اللي مرسوم عليه بيانو يالهوى على جماله".
اللعب الفجر
وقالت ريهام: "فاكر وأنت صغير اسم لوحده مبهج زمان أيام اللمة والعيلة الضحك اللى صوته مابيخلصش الصبح وتيتا بتصحينا بدرى علشان الفطار واللبن اللى مكنتش بحبه فتحطلى عليه كاكاو علشان اشربه اللعب الفجر وندخل البيت بالراحة علشان تيتا ماتحسش بينا وتقلق وهي نايمة جدو وحكاياته وحنيته وكرمة وطيبته ونصايحة ".
لبس العيد يبات في حضننا
وذكر عمرو: "رمضان والصواريخ قبل الفطار وبكار اللي كنا بنفطر عليه العيد وصوت أم كلثوم وهي بتقول ياليلة العيد انستينا وجددتي الأمل فينا ولبس العيدبيبات في حضننا يوم الوقفة المصيف ولمته في مرسي مطروح أو إسكندرية بحر طول النهار وفسط طول الليل استغماية وكيمو وشد الحبل الأولى والسبع طوبات وعسكر وحرامية والاتاري وشرايطة في التطور شوية الراديو وحكايات أبلة فضيلة".
خلف الأسوار
وأضافت شيمو: "أنا بعون الله الطفلة الوحيدة اللى متفرجتش على كرتون وهي صغيرة أنا اليوم الوحيد اللى كنت بقعد فيه قدام التليفزيون كانت أمى بتفرجنى على برنامج خلف الأسوار، وأفضل خايفة ومش عارفة أنام لحد ما يايا يجي اطلع اقعد معاه يروح مفرجنى على أفلام كلها ناس بتتاكل ودم ورجول طايرة في الهوا لوحدها وافضل اعيط وهو يقولى متخافيش".
ماما بتصحيني على "حبيبة أمها"
وتذكرت غادة: "وأنا صغيرة كان عندي خدودكنت وما زلت بكره اللبن ولما ماما تدينى الكباية أعمل نفسي بشربه وارميه من الشباك كانو بيقولو عليا رويتر أي كلمة اسمعها انشرها كنت لازم أصحى وماما بتغنيلي أغنية صباح"حبيبة أمها" كل يوم ولو مش سمعتها اعيط كنت بسأل أسئلة لماما حرام تتسأل كفيله تخليها تكفر بس كانت بتجاوبني إجابات رهيبة كنت أعيط وعاوزة العب مع العيال في الشارع وماما مش توافق اروح في البلكونة وارمى عليهم ميه والعيال تعيط ".
واستطرد محمود:" فاكر وأنا صغير أغنية ياحلو صبح ياحلو طل الصبح قبل المدرسة قرآن بصوت الشيخ محمد رفعت وقت الشروق الشنط اللى كانت بتتعمل جول ولعب الكورة في الشارع كانت بتتمرمط كليب محمد فؤاد الحب الحقيقي ولو".
بعمل فرق في شعرى
وقال إبراهيم: "وأنا في ابتدائي كنت بحب أعمل فرق في شعري والبنطلون يكون رجليه واسعة ونازل على الجزمة اللى لازم تكون بتلمع".
وأضافت بسمة: "فاكرة زمان وأنا صغيرة لما كنت بستني النهار يطلع عشان أنزل العب مع الجيران أحلى لعب وأحلى وكريات زمان فاكرة زمان لما كنت بستنى الإجازة بفارغ الصبر عشان نتجمع أنا وعيلتى ونقضيها لعب وجدو كان يختمها بضربنا، الواحد نفسه الأيام دى ترجع تانى".
