صديق ماريان ملاك يكشف معلومات جديدة عن سنها وحياتها عكس كل التوقعات
واضافت: خلاص كده متهيالي كل واحد كتب اللي في نفسه و عبر عن رائيه ومتبقاش حاجة تانية تتقال (مفيش حاجة متقالتش) اتقال علي الصفحات اللي هدفها الشو، ان دي عندها 24 سنة و ناس قالتلك 23 بس في الحقيقة ماريان عاشت علي الارض 21 سنة و خمس شهور و ممكن احسبهالك بالساعات لو تحب.
وتابعت: اتقال انتحرت و اتقال وقعت، بس انا بقولك في الحالتين هي عروسة السما وانا واثق من كل كلمة بقولها، لان المسيح اختارها بس هو حب الطريقة دي لسبب علشان يفوقنا كلنا علشان يبينلنا كمية البشاعة اللي احنا فيها ان احنا مكناش عارفين نرحم و نحب ونحتوي بنت جميلة الزمن جه عليها اين تكن ايه المشاكل اللي كانت بتواجهها ف دي حاجة متخصش اي حد، بس عايز اقولك ان حملها كان تقيل وان مكانش في حد هيقدر يتحمل المجهود الذهني و النفسي اللي كانت بتبذلة علشان تتعايش اقدر اقولك ان هي كانت في حرب حرب ذهني مكانتش بتقف دقيقة حرب استنزاف لكل مشاعر طيبة كانت جواها لكل امل كانت عايشة علشانه.
واكملت: اتقال ايه اللي يخلي بنت جميلة زيها و مرتاحة ماديا و عايشة في برج و صورها كلها خروجات و ضحك تعمل كده،
بس حابب اقولك انك متعرفهاش لان اولا هي مش عايشة في البرج زي م انت بتقول، هي بنت عادية جدا و مش غنية علي فكرة عادي يعني هي زينا كلنا ثانيا هي اينعم كانت بتخرج معانا كتير و كنا بنحاول نبسطها علي اد م نقدر بس صدقني لما كانت بتيجي لحظة صمت و هي معانا كانت بتسرح و تتوه في افكارها و احيانا كانت بتبكي.
واختتمت: النقطة اللي حابب اوصلها هو توضيح اد ايه هي كانت جميلة و لو سالت الناس اللي قريبين منها بجد (علي فكرة هما يتعدوا علي الايد و مش كتير خالص لان ناس كتير اوي كانت بتكلم ماريان بس قليل اوي اللي يعرفوها ) هيقولوك ان هي كانت ملاك و عمرها م غلطت غلطة تذكر و اد ايه كانت حد مشاعره رقيقه و علي الرغم من كل اللي هي كانت فيه كانت بتشجع كل اللي حواليها و بتديهم امل و لما كانت بتشوف حد زعلان كانت بتفضل جنبه (فاقد الشئ يعطيه ) هي كانت دايما بتقول كده اتمني اننا نبطل كلام في حاجة منعرفهاش و منظلمش حد معانا احنا كنا ظالمينها وهي موجودة واتمني اننا منظلمهاش و هي مش موجودة.