كرتون توعوي جديد من المتحف المصري الكبير لتعليم آداب الزيارة بطريقة ممتعة

في خطوة جديدة ومبتكرة، أطلق المتحف المصري الكبير فيلم رسوم متحركة قصير بعنوان "حماة تاريخنا: الطريقة الصحيحة لزيارة المتحف"، ضمن حملة حماة التاريخ اللي بدأها المتحف في فبراير اللي فات بهدف تعليم الناس إزاي يحافظوا على الآثار ويحترموا آداب الزيارة.

الفيلم الجديد اللي أطلقه المتحف المصري الكبير مدته من دقيقتين لـ 3 دقايق، و معمول بأسلوب كرتوني بسيط وقصة شيقة تناسب الكبار والصغار، وفكرته مستوحاة من قيمة "ماعت" عند المصريين القدماء اللي بترمز للتوازن والمسؤولية.

الفيلم يعلمك إزاي تزور المتحف المصري الكبير صح

بياخدك الفيلم في رحلة مع أسرة بتزور المتحف المصري الكبير من أول ما يخططوا للزيارة لحد ما يوصلوا ويتجولوا جوه القاعات، وبيوريك مواقف يومية زي أهمية عدم لمس القطع الأثرية، والالتزام بالدور، والمشي بهدوء، والحفاظ على النظافة، وعدم إزعاج باقي الزوار، ومنع استخدام الفلاش في التصوير.

الهدف إن المتحف المصري الكبير يوصل فكرة إن احترام المكان يعكس وعيك وثقافتك.

وزير السياحة: التراث مش ترميم وبس

وزير السياحة والآثار شريف فتحي قال إن الفيلم اللي أطلقه المتحف المصري الكبير جزء من خطة الوزارة لنشر الوعي بأهمية حماية التراث، وإن الحفاظ على الآثار مش بس ترميم، لكنه كمان توعية الناس باحترام المتاحف والمواقع الأثرية.

وأضاف إن استخدام الكرتون والتكنولوجيا الحديثة بيساعد يوصل الرسالة للأطفال والشباب بشكل أسرع، وبيقوي دور المتحف المصري الكبير كمكان ثقافي وتعليمي بيربي جيل فاهم قيمة حضارته.

ومن المقرر عرض الفيلم على صفحات المتحف المصري الكبير على فيسبوك وإنستجرام ويوتيوب، ضمن سلسلة من الفيديوهات واللافتات والأنشطة التعليمية اللي بينفذها المتحف مع شركائه لنشر ثقافة حماية التاريخ.