شاركنا برأيك ..جوزي مش بيهتم بيا خالص وأنا طول الوقت بهتم بيه ..تنصحوني بإيه ؟
خاص لموقع الحق والضلال
كتبت: نورهان عبدالله
أنا جوزي متغرب من حوالى 7 شهور وأنا والولاد قاعدين لوحدنا. المهم المشكلة مع جوزي ابتدت من يوم ما سافر، على طول بحس إنه مش متأثر نهائي ببعده عنى لا عاطفياً ، مش بحس نهائي انه تعبان من غيرى.
وأنا لما بظهرله قد ايه انا متدايقة إنه مش معايا، بيتريق عليا ويفكرنى بمشاكلنا سوى وبحس انه بيكلمنىي تأدية واجب مش اكتر. ولما اكلمه أو ابعتله رسايل بيصدني وبيقفل في الكلام. مش معنى كده انه مش بيكلمني خالص لا بيتكلم ويحكي معايا عادى بس لو حصل وماتكلمناش مش مهم بالنسباله، مع إنى بعمل المستحيل عشان مايعديش يوم من غير ما أكلمه. وكمان بالنسبة للعلاقة الخاصة لما احاول المح بأي حاجة تخصها يقفل معايا ويقول أنا مش بحب اتكلم في الحكاية دي مع انه واحشني اوى. معقول أكون مش واحشاه ومش فارقه معاه؟
من كم يوم اتخانقنا ومبنتكلمش خالص. وانا صعبان عليا منه أوي. معقول ما اشتقش لكلامنا سوى؟ ولا الهزار والضحك اللى بنضحكوا سوى؟ ومعقول للدرجة دي انا تقيله على قلبه ومصدق خلص مني والحكايه جاته من عند ربنا عشان يبعدني عنه. اعمل ايه؟
ملحوظة :
لو عندك مشكله وعاوز تشارك معانا بيها ارسل لنا علي الإيميل ده