جيميناي يتيح الاحتفاظ بمحادثاتك من خلال الذكاء الاصطناعي
تحديث جديد في جيميناي.. احتفظ بمحادثاتك من غير ما جوجل تستخدمها في التدريب
لو بتستخدم جيميناي وخايف على خصوصيتك، جوجل جهزت ليك مفاجأة مهمة، تحديث جديد في جيميناي هيسمح ليك تحتفظ بمحادثاتك وترجع ليها في أي وقت، من غير ما جوجل تستخدمها في تدريب نماذج الذكاء الاصطناعي، ودي خطوة طال انتظارها من ملايين المستخدمين.
إيه اللي غيرته جوجل في خصوصية جيميناي؟
جوجل قررت تفصل إعداد مهم كان موجود في جيميناي، إعداد الاحتفاظ بالنشاط كان بيجمع حاجتين مع بعض، حفظ محادثاتك واستخدامها في التدريب، دلوقتي بقوا خيارين منفصلين تماما، وانت اللي بتتحكم في كل واحد لوحده.
الخيار الأول في جيميناي اسمه السجل، وده بيحدد هل محادثاتك هتظهر في سجل جيميناي ولا لأ، وقد إيه هتفضل محفوظة، وتقدر تراجعها أو تمسحها بنفسك في أي وقت.
الخيار الثاني في جيميناي خاص بالتدريب، وده بيحدد هل تسمح لجوجل تستخدم محادثاتك الجاية، بما فيها النصوص والصور والملفات، في تطوير وتحسين نماذج الذكاء الاصطناعي ولا لأ، يعني تقدر تحتفظ بالسجل وتقفل التدريب، وتفضل مرتاح البال.
جيميناي هيحتفظ بمحادثاتك شهرين حتى لو قفلت السجل
من أهم التغييرات في جيميناي، إن المحادثات الجديدة هتفضل محفوظة لمدة شهرين تقريبا، حتى لو قفلت إعداد السجل، وده عشان جيميناي يقدر يقدم ليك الخدمة ويرد عليك، ويعالج الملاحظات اللي بتبعتها، وكمان يحميك من أي مشاكل أمنية.
وجوجل وضحت إن آخر 24 ساعة من محادثاتك ممكن تستخدم عشان جيميناي يفهم سياق كلامك ويرد عليك صح، وده كان قبل كده 24 ساعة بس للسياق و72 ساعة للحماية، لكن دلوقتي المدة بقت أطول.
هل إيقاف التدريب في جيميناي يمنع مراجعة محادثاتك؟
هنا لازم تاخد بالك من نقطة مهمة في جيميناي، لو قفلت السجل ومبعتش أي ملاحظات، جوجل أكدت إنها مش هتستخدم محادثاتك الجاية في التدريب، لكن لو بعت ملاحظة عن إجابة جيميناي أو بلغت عن مشكلة، جوجل ممكن تجمع الملاحظة والسياق بتاعها، بما فيه جزء من المحادثة والمرفقات، عشان تحسن الخدمة.
وكمان سياسة خصوصية جيميناي بتقول إن المحادثات اللي بتتراجع بشكل بشري ممكن تتفصل عن حسابك وتفضل محفوظة لحد 3 سنين، حتى لو مسحت السجل أو غيرت إعداداتك بعد كده.
امتى هيوصل تحديث جيميناي الجديد؟
جوجل هتبدأ تطرح إعدادات الخصوصية الجديدة في جيميناي عالميا خلال الأسابيع الجاية، على مراحل، وهتبعت للمستخدمين إيميل يوضح التغييرات.
ولو كنت قافل الاحتفاظ بالنشاط قبل كده، الإعدادين الجداد في جيميناي هيفضلوا مقفولين عندك، ولو كان مفتوح، السجل هيفضل مفتوح، بس هتقدر تاخد قرار لوحدك بخصوص استخدام بياناتك في التدريب.
ويؤكد تحديث جيميناي الجديد بيأكد إن جوجل بتحاول تديك تحكم أكبر في بياناتك، خصوصا مع انتشار تطبيقات الذكاء الاصطناعي واعتمادنا عليها كل يوم في الشغل والمذاكرة والحياة، فادخل دلوقتي على إعدادات جيميناي وظبط خصوصيتك بالطريقة اللي تناسبك.