أمنيات النشطاء لمصر في 2016
محدش يتوقعها
قالت هدير: أنا مغتربة نـفسي ارجع مصـر ، وذكر محمود: "مصر دي محدش يتوقعها"، وعلقت فاطمة ضياء: "بص طول ما نت في مصر اعرف إنك ماشي صح"، وتابع بدر عبدالنعيم: "مستني إيه من مصر تاني دا الدبان لِسَّه قاعد واحنا ف عز البرد".
كأس العالم
وقالت علياء بنت محمد: "تبقي أحسن من مصر السنين إلى فاتت"، ورد إسلام أحمد: "مصر تدخل تصفيات كأس العالم"، وأضاف جو: "نفسي يظهر حد زي محمد علي باشا يرجع يمسك مصر ويبنيها من جديد، ده الراجل اللي حب مصر بجد".
وعلق عمر حسني: "تحيا تحيا زي كل سنة تحيا مصر"، وتابعت آية عيسى: "مصر مش هتتغير لوحدها ع فكرة".
الاستقرار
وقال سيد خضر: "إن شاء الله يكون عام سعيد على مصر وأهل مصر، ويارب الاستقرار إن شاء الله مصر هتبقي بخير بحبك يا مصر"، وأضافت سمر محمد: "مزيد من الاستقرار والأمان، مصر رجعت شمسك الدهب، وإن شاء الله مصر هتبقى قد الدنيا"، وعلق سامي أبوسابا: "تفاءلوا بالخير تجدوه"، يا رب مصر ما لهاش غيرك وإنت القادر على كل شيء يا رب إنك تقول للشيء ''كن فيكون''، يا رب".
وتابعت سمر حسام: "مصر فاقت كل التوقعات، أكيد هتعدي كل التوقعات بردو كالمعتاد".
عام خير وبركة
أما سيكو فقال: "بحاول أقنع نفسي إن 2016 هتبقى أحلى، ضميري يرد عليا ويقولي بطل كذب ميبقاش حظك في الدنيا مصر وفي الآخرة جهنم"، وقالت مصرية وأفتخر: "الخير والسعادة والفرحة يااارب افتح هذا العام علينا بالخير والبركة، مصر هاتفضل أحلى وأحلى رغم الظروف اللي فيها"، وأضاف محمد:" أتمنى أن مصر توصل للمركز 140 في جودة التعليم".
وعلق محمود أفندي: "أتوقع إيه؟ مصر دي مكارة ودحلاب ما تعرفلهاش توقع"، وتابعت منة الزرقا: "أتوقعلها كل خير طبعا إيه ولا أي حاجة هتحصل مصر هيا مصر هتفضل مصر عادي يعني ملل أقسم بالله".
ورد آية حسن: "أنا متفائلة في أي حال من الأحوال مصر مش هتوصل لمرحلة أنيل لأن مفيش مرحلة أنيل أكتر من اللي هي وصلتله".
هتبقى أحسن
وقال ماجد أحمد: "الاستقرار والأمان بإذن الله سبحانه وتعالى يارب احفظ مصر"، وذكرت حنان: "الله يحفظ شعبها البسيط الطيب ويرزقهم من واسع فضله، الله يجبر بخاطرهم، مصر قلب أم حنون وبسيط"، وتابع عمار يحيي: "مصر إن شاء الله هتبقى أحسن من الأول يارب"، ورد ماجد: "الخير كله ونكيد كل حاقد وفاسد وإن شاء الله في مقدمة الدول اللهم ارحم شهداء مصر".
وتابع إبراهيم هلال: "مصر الوحيدة اللي متعرفش تتوقعلها حاجة، هي على طول بتفاجئنا بحاجات أول مرة نشوفها في حياتنا، مصر بلد العجائب"، وأضاف إيهاب عامر: "انطلاقة اقتصادية غير مسبوقة ولا متوقعة وانهيار تام لقواعد الإرهاب في مصر وتساقط النخبة الفاسدة".
